resolución publicada no dog

O Instituto Galego de Consumo premia as teses de doutoramento e os traballos de investigación realizados no eido do consumo

29.12.2007

O Diario Oficial de Galicia vén de publicar unha resolución do Instituto Galego de Consumo (IGC) pola que se dan a coñecer os gañadores dos premios convocados polo organismo dependente da Consellaría de Innovación e Industria ás teses de doutoramento e traballos de investigación realizados no eido do consumo. Á hora de conceder estes galardóns, o Instituto tivo en conta a orixinalidade dos proxectos, o interese do tema para Galiza, a aplicación práctica da investigación desenvolvida á realidade actual e a utilización da lingua galega na redacción do traballo.

Deste xeito, outorgouse un primeiro premio de 3.000 euros e dous accésits de 1.000 euros cada un, tanto na modalidade do concurso dirixida a teses de doutoramento como na modalidade dirixida a traballos de investigación. Así, na modalidade de teses de doutoramento o primeiro premio correspondeu á tese “Development of laser-induced fluorescence methods as a powerful tool for chromatographic analysis in food safety”, de Xesús Feás Sánchez, e os accésits foron para as teses “Cryptosporidium en moluscos bivalvos”, de Hipólito Gómez Couso, e “Desarrollo de metodologías para la determinación de metales en miel mediante ETAAS y estudio quimiométrico de su empleo como bioindicador”, de Juan Carlos Rodríguez García.

Na modalidade de traballos de investigación, o primeiro premio correspondeu ao titulado “Imos á publicidade. Elaboración dun material educativo audiovisual para a identificación de contravalores na publicidade de televisión”, elaborado por  Marta María Moro Rodríguez, mentres que os dous accésits concedéronse aos traballos “Estudo de polifenoles en viños brancos galegos e determinación da súa actividade antioxidante”, de Ana Rodríguez Bernaldo de Quirós e “Valoración analítica do cefalotórax do cangrexo vermello (Chinocetes opilio) para o seu aproveitamento en pensos destinados á acuicultura”, elaborado por María Vilasoa Martínez

Todas as teses e traballos premiados serán publicados na páxina web do Instituto Galego de Consumo www.igc.xunta.es.