A idade real das pedras

Os restos arqueolóxicos atopados en Gondomar atrasan ata o 5.000 antes de Cristo a orixe dos petroglifos

A investigación sitúa no Chan do Cereixo as pegadas máis antigas do neolítico en Galicia

F.P.. VIGO

Detalles dos traballos e das pezas achadas nas excavacións do Chan do cereixo FOTO: GH

Os restos arqueolóxicos achados no concello pontevedrés de Gondomar poderían remontarse ó 5.000 antes de Cristo, o que supón atrasar a datación dos petroglifos 2.500 anos con respecto ao que ata agora se cría, segundo explicou onte en Vigo a arqueóloga Rosa Villar.

Un grupo de científicos que traballaron durante os meses de xullo e agosto no depósito de Chan do Cereixo, en Gondomar, encontraron unha mostra de petroglifos do quinto milenio antes de Cristo, no Neolítico pleno.

Porén, as pezas encontradas ata agora na comunidade son de finais do terceiro milenio antes de Cristo e principios do segundo, polo que o achado permite, segundo Villar, "colocarnos uns 2.500 anos para atrás".

Nunha rolda de prensa de presentación das conclusións da investigación, a arqueóloga explicou que neste recinto dun millón de metros cadrados se inclúen estruturas "inéditas" na arqueoloxía galega do período neolítico.

Tamén engadiu que nas proximidades do achado apareceron os vestixios dunha cabana e dun silo perforado na rocha, que foi utilizado como depósito de cereal. Este contexto arqueolóxico acóutase no espazo mediante un muro rochoso no que existe un espazo para a canalización de augas.

Todos estes restos son coetáneos, igual que outras mostras aparecidas, como lascas, unha estela de granito colocada verticalmente e unha landra carbonizada. Cunha orixe máis antiga, do Paleolítico, tamén se encontraron diversos materiais. A pesar de que esta primeira incursión no territorio se realizou durante dous meses, a importancia dos achados que contén fai crer á coordinadora da investigación que "serán imprescindibles cinco anos" de labores.

Na súa presentación de onte, a arqueóloga destacou o conxunto formado polo petroglifo, a cabana e o muro, que se encontran no outeiro das Campurras, que pertence a Chan do Cereixo xa se trata dun contexto "inédito" na comunidade. Alí encontráronse restos de carbón que permitiron realizar unha datación exacta mediante o método do carbono 14, que confirmou que estes restos, de máis de 5.000 anos de antigüidade, son do mesmo período.