historia

A memoria do ex alcalde teense

A asociación A Oliveira de Teo lembrará este sábado o republicano Benjamín Salgado

REDACCIÓN . SANTIAGO

O antigo alcalde de Carbia, Benjamín Salgado Uribe

A asociación para a recuperación da memoria histórica A Oliveira de Teo homenaxeará este sábado, a figura de Benjamín Salgado Uriarte, que foi alcalde do concello de Carbia, actual Vila de Cruces, no 1936. A xornada celebrarase no local da Asociación de Veciños de Recesende, ás 20.30 horas, en Teo.

Nado no 1899 en Vilar, parroquia de Cacheiras, Benjamín Salgado foi o quinto fillo da mestra Marcelina Uribe e do médico Fernando Salgado. Viuse obrigado a emigrar a Cuba onde traballou na Habana e percorreu América, dende Estados Unidos até Bos Aires, traballando de xornalista.

Regresou a Galicia e abriu en Arzúa, en sociedade coa súa familia, un coñecido almacén de tecidos e gañou o aprecio dos seus veciños. Tras a morte do seu pai, instalouse cun irmán, en Vila de Cruces, onde abriron un ultamarinos. Participou no tecido asociativo da II República e como consecuencia do triunfo da Fronte Popular, foi elixido alcalde.

Porén, coa rebelión militar do 18 de xullo, trasládase a Pontevedra, xunto con cargos sindicais e políticos do Deza, para recibir ordes do Gobernador provincial.

Teme pola súa vida e decide agocharse en Compostela e logo en Arzúa. No seu refuxio enferma da tuberculose que lle causará a morte no ano 1950, apenas catro anos despois de ser indultado do delito de "rebelión militar" que non cometera.

Na xornada que a Oliveira lle dedica a este home natural de Cacheiras, presentarase un novo número da Voandeira da Oliveira.