VOTO EN BRANCO

Nin arte nin cultura

MANOEL SANTOS

Pontevedra amenceu o 8 de agosto enchida de pintadas e carteis rexeitando o que chaman "festa nacional" ­ -claro está, referida a esa entelequia de nación española que só parece selo na Constitución aprobada polos que hoxe teñen máis de 48 anos. Eran papeis e gravados rebeldes contra a exaltación do sangue sobre a area, ao cabo tamén vermello sobre amarelo, contra ese noxento e reaccionario goce co sufrimento animal que para min simboliza as históricas barbaries cometidas -en nome de Deus e da Coroa!- polo imperio doutrora contra a "incultura dos indios". Como ben di a Plataforma Antitaurina de Pontevedra: "a tortura non é nin arte nin cultura".

Os anteditos graffitis estaban na súa meirande parte sobre carteis que publicitan o que a Plataforma chama xenocidio animal. E chama ben, pois do exterminio dunha raza falamos. Asemade, na praza de touros líase: "se as touradas son arte, o canibalismo é gastronomía" -pura lóxica- e tamén "non á festa do fascismo". De feito, polo enxalzamento nacionalista, pola imposición do sanguento pensamento único nos medios de comunicación públicos e polo irracional culto a un duce ao que din, e tamén din ben, matador, a cousa ten un cheiriño algo fascista.

E fascista debe ser cando a protesta pacífica dos activistas foi respostada primeiro co acoso policial -ninguén máis pega carteis en Pontevedra?- e despois cunha violenta acción, literalmente incendiaria, o día 11 contra o Centro Social A Revira, que entre outras cousas sérvelle de ágora aos antitaurinos do Lérez. Non é pois de estrañar que estes se sentan acosados, e sinalan polo miúdo -no referente ao asedio verbal- a un grupo de amantes dos matadores, a Peña 11. Un dos seus membros ten un blog (cesarabal.blogspot.com) moi clarificador. Tolerante el, deféndese das accións pacíficas dos antitaurinos con incongruencias como: "La Peña11 es una peña plural y libre que respeta todas las opiniones". Non así todas as vidas, diría eu. Porén, do atentado non di ren. Supoño que o do día 11 e a Peña 11 é casual, que eu na cabalística créovos pouco.

Sexa como for, vai sendo hora de que os gobernos galegos -con-­ cellos e Xunta- collan o touro polos cornos, pero para afastalo desa crueldade sen sentido ­prohibindo a tortura animal no país noso. Un 10 -non un 11- para os da Plataforma Antitaurina.