Advento mariano

Disque foron a Barcelona a fartarse de abrazos e de crema catalá O Noso Mariano, os seus mariachis e o variado repertorio de baróns e frikis que ten que aturar. Estas exaltacións publicitarias da amizade están moi ben e quedan moi aparentes nos medios, pero amáñanche máis ben pouca cousa. Tanto ten que vaian uns e queden outros, ou se quen se ausentan teñen escusa ou só carecen de educación. Son anécdotas sen máis transcendencia que a súa propia irrelevancia. O problema para resolver segue a ser que algunha das que se abraza ó Noso Mariano quere ir no seu sitio, e moitos queren ir con outro no seu sitio. Mentres non solucione iso, pasará máis tempo amañando os seus problemas, que contándonos como ten pensado amañar os nosos.