"Non somos un produto comercial"

Dedicada ao mundo da música e do xornalismo, a lucense Alba Porral é a voz de The Lonely, unha innovadora e independente banda. O bo rock nunca morre

. PATRICIA CASTELLANO

Alba Porral cos demais membros do grupo mariñán The Lonely FOTO: THE LONELY

Despois de dúas maquetas, de compartir escenario con grupos como Mistakens, Sexy Sadie ou Deluxe, cales son os vosos proxectos para verán?

O dez de agosto estaremos en Baiona e o 18 no festival Son e Arte, en Viveiro. Nas nosas mentes está seguir tocando moito, divertirnos e conseguir que os nosos espectadores o pasen ben, que vibren con cada novo tema. Temos previsto facer concertos fóra de Galicia. As datas dos concertos témolas actualizadas na nosa web: www.thelonelyweb.com.

Dende que o grupo se formou, no ano 2000, experimentastes moitos cambios, como foi a vosa evolución?

O proxecto comezou de xeito espontáneo. Coñecémonos no Conservatorio de múscia de Viveiro e lanzámonos ao descoñecido. Co tempo vimos que a fórmula funcionaba, eramos capaces de divertirnos e ó mesmo tempo compor con calidade.

En que estilo os etiquetades?

Non nos gusta falar de etiquetas de ningún tipo. Moitos son os que falan da nosa música como pop-rock, aínda que non é totalmente certo. O rock é un termo que abarca moitas posibilidades. O que nos prace realmente é experimentar cos diversos estilos. Probar cousas novas sen enmarcarnos.

The Lonely non son popeiros....

O certo é que a banda experimentou un certo cambio no 2002. Por mor do cambio de batería, que agora é o noso técnico de son, os temas encamiñáronse máis cara a un rock máis duro, cun toque máis "leñeiro".

É dificil para un grupo galego abrirse camiño cantando en inglés, non pensastes en facer algo máis comercial?

Para nada. Nunca nos guiamos polo mercado, o último que desexamos é converternos nun "produto". Precisamente o que lle chama a atención ao noso público é que concibimos a música como música e non como un ben mercantil. O noso é un grupo independente alimentado pola arte propiamente dito.

Para cando algún tema en galego?

Polo de agora tamén compuxemos en francés , alemán e temos previsto facer algo en portugués... Non nos gusta limitarnos.

José Louzao é o baixo do grupo e tamén o teu mozo. Como se leva compartir amor e traballo?

Moi ben! É un apoio constante para min. Comezamos a nosa relación cando o grupo xa estaba formado e ademais de parella somos amigos. Ademais é tamén unha boa fonte de inspiración.

Como todos os grandes, tamén terás as súas manías antes de saír ao escenario...

O certo é que os grandes escenarios me dan vertixe, sempre sinto un pouco de pánico escénico... Así que para despexar a miña mente e a miña voz, sempre bebo antes de saír a cantar unhas claras de ovo.

Ti es unha persoa comprometida co mundo, que cambiarías hoxe en día?

Gustaríame que as persoas abrisen os ollos dunha vez por todas á realidade. Gustaríame unha sociedade na que a moralidade e a legalidade estivesen marcadas polos límites da coherencia.

Ademais da música tamén es estudante de xornalismo, pensas deixalo un pouco a parte?

Encantaríame poder dedicarme profesionalmente á música, pero hai que ser realista e o certo é que este mundo é cousa difícil. O perfecto sería poder combinar ambas as dúas cousas. Polo de agora non me formulo nada a longo prazo.

Tras "Shadows" e "Notre Monde", para cando un novo traballo?

En Nadal temos pensado iniciar a gravación da nova maqueta,un novo proxecto bastante novidoso.