escaramuza entre socios.

Onde está wally? (intrahistoria dunha foto)

12.07.2007

FOTO: S. Daponte / agn

Socialistas e nacionalistas xogaron unha partida de xadrez para rendibilizaren, cada un pola súa banda, o abraiante desembarco en Vigo do presidente Zapatero coa vicepresidenta De la Vega e cinco ministros. Desde a área de Protocolo da Presidencia da Xunta intentouse xa nun primeiro momento –e así se lles fixo saber ós socios do Bloque– que o vicepresidente Quintana e o conselleiro Fernando Blanco non tivesen acceso ó buque de investigación Sarmiento de Gamboa, malia que os nacionalistas achegan desde Innovación un 20% do investimento nel. GH confirmou que o número dous de Vicepresidencia moveu os seus fíos na Moncloa e conseguiu o okei, o mércores pola tarde, para que Blanco se integrase na comitiva. Unha nova xestión diplomática de Antón Losada fixo posible, in extremis, que tamén entrase no grupo dos elixidos o propio Quintana. A guerra xorda entre PSdeG e BNG trasladouse ós medios, de xeito que nin nas fotos enviadas pola axencia oficial Efe nin no informativo de mediodía da TVG apareceron por ningún sitio o vicepresidente galego (nun círculo, na foto da axencia privada AGN) ou o titular de Industria, relegados a un segundo plano na visita ó barco.