Pontevedra antitaurina

15.08.2007 Un grupo de mozos pontevedreses que ve a Feira Taurina da cidade do Lérez, a máis antiga que hai en Galicia, como “unha lamentable exhaltación da violencia”, decidiron este ano organizarse e crear a Plataforma Pontevedra Antitaurina, para realizaren unha protesta contra as “touradas” e informar da crueldade desta tradición

. A.L.

Unha das intervencións plásticas contra as corridas de touros que se celebran durante o verán en Pontevedra FOTO: Pontevedra Antitaurina

No manifesto fundacional que fixeron circular por internet, a Plataforma Pontevedra Antitaurina deixa ben claro que a súa intención é "loitar para que as touradas pasen a ser un recordo do pasado máis escuro" e que as consideran como "unha pseudo-tradición atávica e cruel que pretende o divertimento a partir da mutilación e o martirio dun animal".

A súa actividade deixouse notar en Pontevedra durante os días de celebración da Feira Taurina, que remata hoxe. A Plataforma Antitaurina realizou pintadas sobre os anuncios oficiais da feira, como se ve na foto, e colocou as súas propias pancartas e carteis de protesta en lugares habilitados polo concello para tal fin.

Do mesmo xeito, a plataforma preparou tamén un decálogo no que refutan, de xeito razoado pero contundente, os principais argumentos a prol da celebración taurina. "Deixa cartos, e tamén o tráfico de armas. É unha tradición, pero tamén o eran a escravitude ou os sacrificios humanos. Son un espectáculo, pero un que transmite e xustifica valores negativos, como o uso da violencia e o goce coa tortura".

Varias estrelas apoian un anuncio antitaurino en Francia

As protestas contra as corridas prodúcense tamén noutros lugares do mundo. Así, os actores Jean Claude Van Damme e Alenxandra Paul, a modelo Twiggy Lawson reclamaron que se difunda un anuncio antitaurino rodado polo cantante francés Renaud para a televisión pública.