PISCIFACTORÍAs

Malpica tamén berra contra o plan acuícola

A Costa da Morte maniféstase contra o proxecto que quere condenar Seiruga e acusa a Xunta de "hipotecar o litoral"

J. M. RAMOS . MALPICA

Os manifestantes percorreron as rúas de Malpica para pedir modificacións no Plan Acuícola FOTO: RAMÓN BUSTO

Se isto non se amaña, ¡caña, caña...!" Esta foi unha das numerosas consignas coreadas onte en Malpica de Bergantiños, onde máis de medio milleiro de persoas manifestáronse en contra do plan acuícola deseñado pola Consellería de Pesca, e en especial, contra a inclusión neste da área de Seiruga.

Ademais de veciños de Malpica, uniformados con camisetas de cor laranxa, entre os manifestantes resaltaban tamén as de cor azul, que vestían os de Merexo (Muxía), e as verdes dos de Camelle (Camariñas) que, unha vez máis volveron unir as súas voces en contra da localización de piscifactorías nas súas respectivas localidades.

A eles sumáronse tamén representantes do colectivo ecoloxista Verdegaia e de todos os grupos políticos de Malpica, entre eles o alcalde, o socialista Ramón Varela que a semana pasada intentou en balde convencer a conselleira para que Seiruga se excluíse do Plan.

A marcha partiu da casa consistorial e dirixiuse ó porto, concluíndo unha hora despois. Durante esta oíronse peticións de dimisión a Touriño e Gallego, á que acusaban nas pancartas de deseñar "un plan hipotecario para a costa".

A presidenta e o portavoz da plataforma Seiruga Limpa, Irene Muíño e Alfonso Vidal, antes de disolver a concentración, acusaron a Xunta de deseñar un Plan Acuícola que "é un feixe de mentiras", xa que mentres a Administración autonómica afirma que se van crear 2.800 postos de traballo en Galicia, "as empresas din que só serán 1.200". No caso de Seiruga, engadiron, "ó noso alcalde dixéronlle que serían 50, e se facemos o cálculo polo plan serían 127". Cren así mesmo que se está "especulando" cos terreos, pois, segundo Vidal, en Mougás pagáronse terreos a 30 euros o metro cadrado, "mentres que aquí só valen seis, en Merexo nada, e en Camelle unha miseria". Entre as razóns que veñen esgrimindo os veciños para oporse á construción dunha granxa acuícola en Seiruga está o impacto visual e ambiental nunha zona con gran potencial turístico.