PORTUGAL

Mira denuncia os "5 pecados ambientais" de Pescanova

Quercus convoca mañá unha protesta para denunciar o inicio das obras da piscifactoría que xa "arrasaron unhas 100 hectáreas en Rede Natura"

R. FERNÁNDEZ . SANTIAGO

Estado das dunas de Mira tras o comezo das obras de Pescanova FOTO: QUERCUS

A "destrución" de dous millóns de metros cadrados de Rede Natura na localidade portuguesa de Mira para construír a macropiscifactoría de Pescanova xa comezou. A pesar das alegacións presentadas e das dúas accións xudiciais interpostas polo colectivo ecoloxista Quercus, cen hectáreas de terreo xa foron "arrasadas", segundo manifestou onte a este xornal o portavoz desta asociación lusa, Antonio Luis Campos. "As obras van moi rápido, xa hai dúas estradas sobre as dunas e os impactos sobre o medio son incuatificables", afirma Campos.

Ante esta situación, Quercus en colaboración coa Asociación para a Defensa Ecolóxica de Galicia (Adega), convocaron para mañá en Mira unha acción de protesta coa que amosarlle á opinión pública os "cinco pecados ambientais" que está a cometer Pescanova na zona: ameaza á biodiversidade, desordenamento do territorio, polución mariña, ocupación do litoral e deficiencias no estudo de impacto, no que non se recolle iniciativas alternativas cos que paliar todos estes danos.

O acto terá lugar ás 10.30 horas (hora portugesa) na área de piñeiral protexida pola Rede Natura na que se vai levar a cabo a instalación da macrogranxa e contará coa intervención de membros de Adega sobre esta problemática en Galicia. "En contra dos beneficios económicos e sociais que predica Pescanova, a construción da fábrica vai repercutir negativamente sobre a poboación local e a súa forma de vida, algo que poden corroborar os compañeiros de Adega, poñendo casos prácticos do que xa aconteceron en Galicia", explica o voceiro de Quercus. Con esta actuación, os ecoloxistas lusos pretenden dar a coñecer todo o que se está a facer mal, co visto e prace do Goberno luso, denunciar os impactos e facer presión para que tanto a Opinión Pública como o poder xudicial se posicionen a favor da protección do territorio. "Detrás deste proxecto hai intereses económicos moi grandes, pero por riba de todo debe estar o noso medio e os noso propios recursos", apunta Campos.