estudo

Mozos investigadores xa non confían no i+d+i

Suspéndeno cun 4,2 sobre dez ·· O 92 por cento deles pensa que os traballos que realizan nunca acabarán chegando á sociedade

E.P. . MADRID

O 92 por cento dos mozos investigadores españois pensa que non vai existir unha acción comercial que trate de distribuír e difundir os novos produtos ou coñecementos, segundo as conclusións do segundo informe Innovacef, un estudo realizado polo Centro de Estudos Financieiros (CEF) en colaboración coa Federación de Mozos Investigadores/Precarios.

Por segundo ano consecutivo o sistema de I+D+i español suspende en canto ó grao de confianza que esperta no colectivo dos mozos investigadores españois (valoración de 4,2 puntos sobre 10). O informe realizouse sobre unha mostra de 259 mozos investigadores espa- ñois sobre un universo de 25.000.

Respecto do ano anterior produciuse un incremento na porcentaxe dos mozos investigadores que pensan que a acción comercial que se vai producir para difundir e distribuír estes resultados ás empresas ou á sociedade vai ser escasa ou nula (92% en 2007 fronte ó 88% de 2006), polo que parece difícil que se produza unha adecuada transferencia dentro do sistema de I+D+i español que lles proporcione unha maior confianza ós Mozos Investigadores.

Insatisfacción na carreira e formación insuficiente

Factores como a insatisfacción dos investigadores na súa carreira profesional, a insuficiente formación para seguir desenvolvendo as súas habilidades e a práctica inexistencia de accións comerciais posteriores á obtención dos coñecementos para a súa difusión provocan a falta de confianza dos nosos mozos investigadores.

Así, o 73% considera que hai escasas ou nulas posibilidades de patentar, o 80% non ten expectativas de recibir formación que lles permita profundar nos traballos que están desenvolvendo, e ó 71% non lle satisfai ou o fai escasamente o plan de carreira investigadora, segundo o estudo do Centro de estudos Financieiros.

O traballo só lles reporta beneficios a un 8 por cento

Na actualidade, soamente o 27 por cento dos investigadores está cooperando con outros socios para a realización de proxectos de I+D+i multidisciplinares, e só o 8 por cento afirma que o seu traballo xa está axudando a incrementar os beneficios económicos da organización, indícase no estudo.

Ademais, o 62 por cento ten escasas perspectivas de mellorar a súa propia produtividade.

Pola contra, o 46 por cento cre que se obterán novos ou mellorados produtos ou procesos a partir das súas investigacións, e máis da metade (56 por cento) dos mozos investigadores está de acordo cos recursos económicos de que dispón para realizar as súas investigacións e, aínda que a gran maioría desta porcentaxe considera que serían necesarios algúns fondos máis, non cre que este aspecto prexudique o cumprimento dos obxectivos principais do seu proxecto.