boicot

Vinte mozos rebentan o I Foro de Emprego do campus da USC

Os alumnos poden deixarlles o curriculum ás firmas participantes e facer entrevistas de traballo

. REDACCIÓN

Ó berro de ‘Fóra as empresas da Universidade’, mozos radicais boicotearon o I Foro do Emprego na USC FOTO: C.G.

Un grupo de vinte mozos da Assembleia Xeral de Estudantes boicoteou onte a inauguración do I Foro do Emprego da Universidade de Santiago.

Ó berro de "Fóra as empresas da universidade", durante tres cuartos de hora, os mozos ameazaron os congresistas, tiraron folletos, berraron polo hall da facultade, insultaron ó traballador dunha empresa de seguridade privada e golpearon a porta dunha das aulas. Algúns deles cubrían as cabezas con capuchas e os rostros con bufandas.

O vicerreitor de Comunidade Universitaria e Compromiso Social da USC, José Manuel Mayán Santos defendeu a filosofía do encontro. "¿Onde van traballar os nosos titulados? É obvio que nas empresas. Por iso é polo que neste tipo de encontros pretendamos achegar as empresas ó mundo universitario. É lóxico que a universidade teña relación co tecido produtivo", explicou.

No I Foro do Emprego da USC, os estudantes non só tiñan a ocasión de presentar as súas demandas de emprego e os seus curriculum, senón que, nalgúns casos xa podían celebrar entrevistas cos responsables da selección de persoal dos expositores.

Unha das estudantes que asistiu onte á primeira xornada do foro, Candela, asegurou que "esta iniciativa é útil para saber onde buscar emprego. É a primeira vez que participo nun foro semellante e o que máis valoro é que nos ensinen como buscar traballo e cales son os requisitos que adoitan esixir as empresas".