unións de feito

O Goberno denega as pensións de viuvez a gays

Botou atrás 64 das 65 pedidas

EFE

O número de pensións de viuvez pedidas por parellas de feito de persoas homosexuais desde xaneiro de 2008 a xullo de 2009 ascende a sesenta e cinco, das que sesenta e catro foron denegadas pola Seguridade Social.

O Goberno explica nunha resposta parlamentaria que as denegacións se basean sobre todo no incumprimento dun ou varios requisitos da lei de medidas da Seguridade Social, que entrou en vigor en xaneiro de 2008. O texto legal recoñece, con carácter excepcional, o dereito das parellas de feito á pensión de viuvez cando producíndose a morte con anterioridade á entrada en vigor da lei concorran determinadas circunstancias. Entre elas, que a parella de feito mantivese unha convivencia ininterrompida durante, polo menos, os seis anos antes da morte dun dos seus membros; que tivesen fillos comúns; constituírse formalmente como parella de feito dous anos antes do falecemento, así como cotizar un período mínimo de 15 anos.

O Executivo afirma que a ausencia dunha regulación xurídica xeral sobre as parellas de feito fai necesario identificar a súa situación a efectos da acción protectora da Seguridade Social.