sida

Pola vía do sexo inseguro

Galiza contabiliza 1.025 infeccións por VIH e 485 novos casos entre 2004 e 2008. O modo principal de contaxio é o heterosexual e hai un incremento da afección nos estranxeiros

REDACCIÓN . SANTIAGO

A conselleira de Sanidade, Pilar Farjas, amosa un condón feminino que forma parte dunha campaña de prevención FOTO: Lavandeira jr.

Primeiro foi a vía parenteral. Despois o sexo homosexual. Agora ante todo o heterosexual. A Consellería de Sanidade detectou en Galiza entre os anos 2004 e 2008 un total de 1.025 novos diagnósticos de infección polo VIH e 485 casos de sida, o que supón un 111 por cento máis de rexistros de infección que de enfermidade. A progresión anual da incidencia é bastante "estable", aínda que rexistra un baixón significativo entre 2007 e 2008, pasando de 34,3 casos de sida -por ano e por millón de habitantes- a 29,8.

Así o confirmou a conselleira de Sanidade, Pilar Farjas, que presentou onte, por primeira vez, os datos do Sistema de Información Galego sobre a infección por VIH con motivo do Día Mundial da Sida, que se celebra o próximo 1 de decembro de 2009. "Con este novo rexistro, a comunidade súmase ao equipo de cabeza das outras oito rexións que declaran actualmente en España casos de VIH", proclamou Farjas antes de recordar que, ata o momento, os datos galegos existentes procedían unicamente do Rexistro Galego da Sida, o que supuña "un baleiro excesivo" na toma de decisións de prevención.

Segundo detallou, entre 2004 e 2008, a incidencia de infección por VIH foi de 74 casos por ano e por millón de habitantes, o que sitúa a comunidade galega "por baixo" da incidencia anual española. Con respecto á distribución por sexos e idades, os homes representan o 75,7 por cento dos VIH en Galiza. O tramo de idade entre os 25 e 44 anos no momento do diagnóstico é o máis elevado, tanto para homes como para mulleres, e alcanza o 71 por cento.

Na distribución por provincias, Pontevedra presenta a maior incidencia de infección no período analizado, cunha media anual de 92 casos por millón de habitantes, seguida da Coruña (77), Ourense (66) e Lugo, con 27 casos por millón de habitantes.

Na súa intervención, a conselleira alertou de que, no 68,3 por cento dos casos, a infección produciuse pola vía sexual -41,7 por cento asociado á heterosexualidad e un 26,6 por cento á transmisión por relacións homosexuais- o que "rompe claramente" coa idea "predominante" de que o contaxio tiña lugar, sobre todo, por compartir material de inxección entre drogodependentes, que supón a cuarta parte dos novos casos rexistrados.

O diagnóstico é moitas veces tardío

Os datos revelan tamén que o 35 por cento dos infectados presentan tamén unha inmunosupresión "moi alta" porque o diagnóstico é "tardío". Neste contexto, Farjas considerou prioritario "promocionar" o diagnóstico precoz entre a poboación e na práctica asistencial para obter o "máximo beneficio" dos avances no tratamento da infección por VIH.

A importancia da prevención foi outro dos puntos nos que incidiu especialmente a responsable de Sanidade antes de presentar os dípticos e folletos dunha campaña impulsada pola Xunta baixo a lema "Detén a Sida. Unidos Podemos".

Por outra banda, Farjas resaltou que o 19 por cento dos novos diagnósticos de infección por VIH rexistrouse en persoas orixinarias doutros países. Por iso, destacou a necesidade de "diversificar" os programas de prevención para adaptalos á poboación inmigrante, social e culturalmente moi heteroxénea, e "especialmente vulnerable", sobre todo no caso das mulleres.

Sobre as categorías de transmisión, os latinoamericanos están maioritariamente asociados ás relacións sexuais non protexidas (no 94 por cento dos casos), mentres que a maioría de estranxeiros europeos infectáronse por compartir material de inxección de drogas, e os que chegaron de África, infectáronse "case todos" por relacións heterosexuais non protexidas (no 93 por cento dos casos).

Cruz Vermella recibe máis de 25.000 chamadas

Cruz Vermella Española recibe cada ano máis de 25.000 chamadas no seu teléfono de atención gratuíto sobre sida, "900 111 000", co que pretende ofrecer recomendación sobre condutas de risco, pautas de actuación e recursos para a prevención desta enfermidade.

Segundo explicou esta institución, desde a creación desta iniciativa en 2005 atendéronse máis de 83.000 consultas, de forma anónima e confidencial, das que a metade están relacionadas con prácticas sexuais, principalmente heterosexuais, e a información solicitada con máis frecuencia fai referencia ás vías de transmisión e á proba do VIH. Ademais deste teléfono, Cruz Vermella tamén dispón do correo electrónico "informacionvih@cruzroja.es" para resolver dúbidas a este respecto.