actuacións dubidosas

PPdeG e bloque queren que se investiguen as compras de votos entre os emigrantes

Un candidato socialista admitiu que propuxo pagar para lograr apoios en Bos Aires

REDAC E AXENCIAS . SANTIAGO/BRASIL

Os portavoces parlamentarios do PPdeG e do BNG, Xosé Manuel Barreiro e Carlos Aymerich, respectivamente, afirmaron onte que a Fiscalía debería actuar de oficio para investigar posibles actuacións “irregulares” de cargos públicos na emigración. Desta forma referíanse ó candidato socialista á alcaldía de Vila de Cruces (Pontevedra), Javier Castelo, quen antonte admitiu que propuxo pagar para recadar votos en Bos Aires, tal e como denunciaron os populares.
“Isto é moi grave e demostra que en campaña electoral vale todo”, sinalou Aymerich, quen anunciou que o BNG traballará, tanto no Parlamento como no Congreso, para evitar que circunstancias como esta, ou como a solicitude do voto rogado por parte de alcaldes do PPdeG en varios actos celebrados en Arxentina e Uruguai, “se repitan”.

Así, considerou que ademais de iniciativas parlamentarias deberían intervir “outras autoridades”, en alusión á Fiscalía, para “depurar responsabilidades políticas e xudiciais”. Ademais, insinuou que, ata o BNG podería pedirlle a este órgano xudicial que actúe. “Hai compras de voto cunha sardiñada e coa suplantación da vontade do elector e isto sábese e tolérase”, dixo e manifestou que o BNG non vai estar “calado” ante este tipo de prácticas.

“Se se dan compoñentes delituosos tería que actuar”, agregou o deputado do PP Xosé Manuel Barreiro, ó referirse ó caso de Vila de Cruces, “así como noutras actuacións, aínda que logo non revistan importancia”. Barreiro insistiu en que a información “recollida nos medios e avalada documentalmente”, sobre o socialista de Vila de Cruces sexa estudada pola Fiscalía para que “se adopten as medidas oportunas”. “Non é admisible utilizar prácticas comerciais para captar votos”, recalcou.

O portavoz parlamentario do PSdeG, Ismael Rego, sinalou que “non comparte” a opinión de que a Fiscalía investigue a Javier Castelo. “Se o fai será para tratar de xustificar algo”, dixo sobre a petición do BNG. O socialista insistiu que o PSdeG “non trata de comprar votos” dos emigrantes, senón de “incentivar” que haxa persoas que expliquen o proxecto socialista en diferentes países. “Temos a xente buzoneando e hai quen o fai de forma altruísta”, engadiu. No entanto, e ante a pregunta de que aínda non comezou a campaña para enviar información electoral, aclarou que se fan outras actuacións “propias da precampaña”.

Ademais, reiterou as súas denuncias contra o PPdeG ó que acusou de “secuestrar” os votos en varios actos realizados por alcaldes deste partido en Bos Aires e Montevideo, nos que se lles solicitaba ós emigrantes unha copia dos seus pasaportes para tramitar o voto rogado. “Iso é o que fixo o presidente da Deputación de Pontevedra, Rafael Louzán, con diñeiro público”, criticou.
Barreiro negou que tanto na visita de Louzán como na doutros alcaldes, como os de Bande, Sada ou Salceda, se pedise o voto rogado. “Está dentro do que son as canles legais”, defendeuse, aínda que insistiu en que censurarán outro tipo de medidas “irregulares”, que “por agora teñen unha patente, a do PSdeG”.

Así mesmo, criticou a viaxe que estes días realiza o presidente da Xunta, Emilio Pérez Touriño, a Brasil e recordou que, cando socialistas e nacionalistas estaban na oposición, tachaban as visitas do daquela presidente Manuel Fraga a América do Sur de “actos electorais. “Resulta que antes o eran e agora non”, ironizou. “Son actos diferentes porque Touriño non participa en ningún acto do PSOE, mentres que Fraga era presidente pola mañá e líder do PP pola tarde”, respondeu Rego.
Neste sentido, criticou ó presidente do PPdeG, Alberto Núñez Feijóo, e recordoulle que “agora non funciona a política do polbo e a empanada”, que favorecía Fraga.

Malia todo, os tres partidos coincidiron na necesidade de activar mecanismos que permitan eliminar as “irregularidades” no voto emigrante e mostráronse favorables do voto en urna.