FÚTBOL SALA

Nova selección galega

O combinado autonómico masculino fará a súa estrea o vindeiro día 29 fronte a Uruguai no pavillón ferrolá da Malata

REDACCIÓN . SANTIAGO

Marta Souto, co cartel anunciador do partido diante dos seleccionadores, segundo e terceiro pola esquerda FOTO: RAMÓN ESCUREDO

A selección galega de fútbol sala debutará o próximo día 29 de febreiro, a partir das nove da noite no polideportivo da Malata, en Ferrol. Os galegos estrearanse fronte á selección de Uruguai, segundo anunciaron onte durante a presentación do combinado autonómico, Marta Souto, directora xeral para o Deporte, o presidente da Federación Galega de Fútbol, Carlos Meana; así como o da de fútbol sala, Luís Pena, e o concelleiro de Deportes de Ferrol Manuel Santiago.

Tamén se deron a coñecer os nomes dos dous seleccionadores que serán, nesta ocasión Bruno García -preparador do Azkar Lugo- e Javier Pardeiro -técnico do CD Burela FS-, ambos cunha ampla traxectoria no fútbol sala.

Os seleccionadores anunciaron durante o acto que en pouco tempo se coñecerán os nomes dos convocados para o partido, pero "aínda estamos realizando a preselección", asegurou Bruno García. No respectivo á elección da cidade departamental para a organización do partido, tanto Marta Souto como o concelleiro ferrolán, e os presidentes de ambas as dúas federacións, coincidiron en sinalar a importancia histórica e da tradición do fútbol sala na localidade coruñesa para que fose designada sede para o debut da selección.

Souto destacou tamén que era de xustiza a creación desta selección, xa que o fútbol sala galego ten unha grande afección detrás, grandes equipos que traballan moi ben a base, e que tamén gozan dun posto privilexiado na elite, contando con xogadores de grandísimo nivel", asegurou a directora xeral, á vez que invitou a todos os ferroláns e galegos a asistir ó encontro a finais de mes.

Tanto Javier Pardeiro coma Bruno destacaron que lles facía moita ilusión que "fosen os propios clubs galegos os que apostasen por eles como seleccionadores".