TECNOLOXÍA

Guía museística virtual

A sede da Fundación Caixa Galicia na Coruña estrea un sistema de Nomasystems para informar os visitantes no seu móbil

HENRIQUE NEIRA . A CORUÑA

Basta situarse nas proximidades dos puntos sinalados co símbolo de tecnoloxía Bluetooth para recibir información no teléfono móbil FOTO: Neira

Textos en galego ou en castelán, imaxes ou mesmo vídeos é o contido que pode transmitir o sistema de información sen fíos presentado onte na sede coruñesa da Fundación Caixa Galicia. Quen visite desde agora as mostras abertas na entidade acompañado dun teléfono móbil con tecnoloxía Bluetooth poderá recibir datos e ata material audiovisual sobre as mesmas no seu propio terminal.

De acordo coa Fundación, é a primeira vez no mundo que se emprega nunha institución cultural un sistema semellante, pois aínda que existen iniciativas parecidas, estas implican o uso de terminais de- señados especificamente para esa función, ou ben o sistema obriga a instalar unha aplicación determinada no teléfono da persoa que visita a exposición.

Agora, por medio do traballo da empresa coruñesa Nomasystems, esas barreiras tecnolóxicas desaparecen e o único preciso é que levemos con nós o móbil coa función de Bluetooth habilitada para recibir totalmente de balde toda a información anexa ás exposicións.

O xerente da sede coruñesa da Fundación Caixa Galicia, Fernando Prieto, apuntou que este sistema "facilita que os propios artistas sexan os que presenten a súa propia exposición", o cal constitúe tamén unha novidade interesante. Podería ser por exemplo cunha presentación en vídeo coma a que gravou o presidente da Real Academia Galega, Xosé Ramón Barreiro, para a exposición Galicia, a forza da palabra, dedicada ó centenario da institución.

Ademais, Prieto lembrou que o sistema é "moi amigable e sinxelo" e que se adapta á tecnoloxía e características de cada un dos terminais ós que lles envía datos, e foi deseñado como un "sistema escalable", que é posible axustar ás futuras melloras da industria de telefonía móbil. De feito, sinalou que "agora está en galego e castelán", aínda que espera que "para o próximo verán estea dispoñible en inglés", facilitando así unha nova posibilidade de acceder á información ás persoas que non dominen ningunha das outras dúas linguas.

Enrique Marcote e Miguel Rodríguez, de Nomasystems, fixeron demostracións das distintas posibilidades que ofrece o seu produto, que entre outras cousas posibilita a localización dos visitantes nas distintas salas, de maneira que a información que se vai enviando ó seu móbil é a necesaria en cada un dos espazos.

Noutra das exposicións aberta na Fundación, sobre a película Pérez, o rato dos teus soños, o que recibimos nada máis entrar é un vídeo de animación no que se nos presenta a película que deu orixe a esta mostra.