No "blog" Ovnis e isoglosas ·· arañeira

Unha comuna feita de versos

O poeta galego Igor Lugrís lanza na rede un "cadáver exquisito" do que 75 persoas crearon 60 poemas

V. OLIVEIRA . SANTIAGO

O poeta galego Igor Lugrís impulsa un interesante proxecto na rede

A arañeira está chea de "cadáveres" poéticos. A idea do cadáver exquisito -un texto con vontade literaria, escrito por diferentes persoas, que van achegando novas partes para ese escrito- tomou forma na rede da man do escritor galego Igor Lugrís. A partir do verso Há umha certa luz incomprensível na distáncia, que o poeta -nado en Melide e residente no Bierzo- lanzou a través da arañeira a finais de febreiro deste ano, xa recibiu até 60 "cadáveres" nos que participaron máis de 75 persoas e que xa se poden consultar no seu blog Ovnis e isoglosas.

É por iso que este sábado, 31 de marzo, se vai facer un recital e unha exposición cos poemas na Galería de Arte Dosmilvacas de Ponferrada nos que participarán os escritores que contribuíron algún verso aos textos así como o cantautor Xosé Constenla que musicou algúns destes "cadáveres exquisitos".

O único requisito que puxo Lugrís para participar na proposta é que os versos estivesen escritos en galego-portugués. O resto queda á liberdade dos creadores: non hai nin tempo límite nin extensión máxima para elaborar un plural cadáver con múltiples pais e nais -non necesariamente poetas- pero si unidos pola arañeira nun xogo de azar poético. "A idea nace dunha reflexión que levo facendo hai tempo sobre a autoría, o pagamento dun canon e os dereitos de autor. Eu mesmo creei varios poemas nos que utilizo versos doutros poetas: de aí a idea do cadáver exquisito: crear un poema que non lle pertenza a ninguén, que non teña un autor definido e tamén para xogar porque a literatura ten moito de xogo e hai que darlle algo de alegría", explica Lugrís, un dos membros fundadores do consello editorial da importante colección de poesía Letras de Cal.

"Estou a favor dos dereitos do autor -aclara o autor- pero creo que non son só económicos: os dereitos deberían ser para que se respecte ou se promocione unha obra pero o único que se ve na mesa de debate son os dereitos económicos. O pagamento dun canon por empréstito nas bibliotecas vai acabar con xéneros minoritarios ou con linguas minorizadas. Realmente, a literatura é un cadáver esquisito porque é universal, así dise que os gregos xa o escribiron todo", engade.

De Elvira Riveiro ou Daniel Salgado a Sechu Sende

Polo de agora, Lugrís recibiu no seu correo 60 "cadáveres" aínda que recoñece que pode haber máis nun futuro non moi distante. "Parte do xogo é iso", sinala. O entusiasmo co que se acolleu o proxecto é facilmente recoñecible pola cantidade de xente que xa participou, entre a que se atopan escritores e poetas coñecidos como Elvira Riveiro, Celso Álvarez Cáccamo, Alberte Momán, Xavier Queipo, María do Cebreiro, Baldo Ramos, Emma Pedreira, Antía Otero, Daniel Salgado, Alberto Lema ou Sechu Sende.

A boa acollida que tivo a iniciativa na rede demostra, ao ver de Igor Lugrís, que "hai moita xente escribindo que non pode acceder ás grandes editoriais e hai que explorar novas vías para promocionar esa xente e dala a coñecer, por exemplo, a través de internet", apunta. "Em Nicarágua todo o mundo é poeta até que se demostrar o contrário", sinala Igor Lugrís en referencia á Revolución Sandinista. "Quero animar a xente a que siga participando porque o cadáver segue vivo", conclúe o escritor.

Un ‘cadáver exquisito’
No ‘blog’ Ovnis e isoglosas

Há umha certa luz incompreensível na distáncia,

unha palabra afogada un sinal ou desexo

que chama por nós en peiraos neboentos

coa voz desacougante e cálida das lumias

Se a liberdade aniña na flor de refugallo

press m and move the mouse

Igor Lugrís Gaspar Domínguez

Eduardo Estévez Elvira Riveiro

Mario Regueira Oriana Méndez