Auxe da videocreación en Galicia

A sexta curta do ferrolán Rubén Coca inaugura o MIVICO"08

Onte proxectáronse a exitosa ‘1977’ de Peque Varela ou ‘Taxi’, protagonizada polo galego Luís Tosar

REDACCIÓN . SANTIAGO

Máis dun centenar de persoas aplaudiron o venres pola noite o filme Mínimo común múltiplo 2.0, a sexta curta do director ferrolán Rubén Coca, na súa estrea no MIVICO"08, que serviu ademais para inaugurar a II Mostra Internacional de Videocreación do Condado.

A curtametraxe narra a historia de Andrea (Marta Larralde), unha moza de 30 anos que vive instalada nunha rutina laboral e sentimental que se esnaquizará no momento máis insospeitado. Coca aposta con este filme por unha historia de amor contada en clave de suspense. Mínimo común múltiplo 2.0, que foi rodada integramente en Ferrol e na que participan os actores Alex Neira, Marta Larralde, Lourdes Sanmartín, Xoel Fernández e Tomás Romero, tende unha ponte entre a madurez e o mundo da infancia. En palabras do seu director "é unha película de recordos da nenez e de encontro coas amizades infantís perdidas co paso do tempo envolvido todo nunha atmosfera de misterio e de suspense".

Tras a estrea, o festival trasladou o seu espazo de actuación ao Pub Flower, onde actuou o grupo portugués Sean Riley & The Slow-riders, que puxeron en escena un repertorio dacabalo entre o country e o pop máis actual.

O eixe central da mostra tivo lugar onte a partir das 18 horas coa posta en marcha das sesións en que se proxectarán os preto de cincuenta traballos a concurso. Proxectáronse os documentais Bata por fóra, unha oda á prenda de vestir máis empregada en Galiza, a videocreación Una fosa común, realizada cunha técnica mixta de animación, a multipremiada 1977, da directora Peque Varela, a proposta de Limoncello ou Taxi, a curta protagonizada por Luís Tosar. A xornada rematou co concerto da banda portuguesa U-Clic, con que o festival reafirma o seu compromiso coa música emerxente e cos vínculos entre a escena galega e a portuguesa.