 |
|
|||||
| ||||||
RSS
Maré |
 |
| Barreiro durante a lectura do comunicado da RAG en presenza dos académicos presentes no plenario de onte FOTO: Almara |
Boa parte dos acádemicos estiveron presentes no plenario de onte, celebrado na sede da RAG na Coruña ante a expectación dos periodistas congregados na rúa Tabernas para escoitar unha intervención cualificada de histórica. Barreiro foi o encargado de ler o comunicado, realizado por unha comisión e aprobado polo resto do plenario. O presidente rexeitou revelar se fora por maioría ou por unanimidade: "Aquí", dixo, "está representada a voz da RAG".
Tomando a Ramón Piñeiro como guieiro
Trátase dun texto de tres folios que coloca a lingua no centro da "identidade e do recoñcemento de Galicia como nación e como colectividade" e que bota man das ideas de Ramón Piñeiro -o autor homenaxeado este ano co 17 de Maio- para lembra que "un pobo ten alma de seu cando posúe idioma, cando fala nunha lingua propia, que tal é o que significa a palabra idioma", porque a linggua "vén ser a súa comunidade esencial".
Outro dos eixes do texto é a noción de que "ninguén é propietario do idioma", mesmo daqueles "que non tiveron a fortuna nin a oportunidade de recibila de seu na infancia". A este cuestión, de feito, referiuse o propio Barreiro ao cabo da lectura na única pregunta que lles permitiu facer aos periodistas: "Toda a sociedade, empezando polos medios de comunicación, é responsable de gardar o idioma, non só as institucións". E engadiu, "É moi preocupante o que está caendo" en referencia ao uso ideolóxico e político que se fixo do idioma en vésperas das eleccións autonómicas por parte de formacións como o PP ou UPyD.
No comunicado, ademais, a RAG "convida" o novo goberno "a que escoiten as institucións que, como a presente, veñen traballando de vello polo idioma, con información, metodoloxía e estudos certos, na procura dun acordo social integrador, a prol do uso, da dignidade e da continuidade do idioma".
REACCIÓN
Feijóo contesta que el non fixo nada
O presidente da Xunta, Alberto Núñez Feijóo, saíu onte ao paso das críticas da Real Academia Galega (RAG) e asegurou que aínda non adoptou "ningunha medida" que xustifique as críticas da institución á súa política lingüística.
Feijóo defendeuse dicindo que a RAG non lle notificou formalmente "ningunha queixa" e reiterou que a súa única intención é traballar dende a Xunta para "recuperar" o "consenso" lingüístico "perdido" na pasada lexislatura "coa aprobación do decreto do galego no ensino".
Núñez Feijóo eludiu avanzar a quen situará como responsable de Política Lingüística no seu Goberno, aínda que subliñou que este nomeamento se efectuará "nos próximos días".
Por outra banda, Feijóo ratificou a súa "inequívoca" intención de derrogar o actual decreto do galego no ensino para elaborar un novo documento "consensuado" con pais e educadores, pero recoñeceu que este podería "non "estar listo" para o próximo curso por unha cuestión "de tempo". "Aínda que nos gustaría que o estivese", aclarou.
Feijóo insistiu en que a Xunta cumprirá o seu compromiso electoral de modificar o decreto do galego no ensino e "se non é posible" facelo para o próximo ano académico non será por "falta de traballo" senón porque o calendario escolar aprema.
AVANCE
Equiparar "dereitos e deberes" co castelán
Como era de esperar, o comunicado da RAG non está tinxido de acritude pero si é o suficientemente claro para recoñecer que os académicos están moi preocupados coa deriva lingüística anunciada por Núñez Feijóo. De feito, non son velados os apoios á política desenvolvida polo goberno de Emilio Pérez Touriño na anterior lexislatura e o chamamento ao líder do PP para "arredar a lingua da controversia partidaria".
Entre outras medidas, os académicos reclaman "reforzar" a presenza do galego no ámbito escolar, con especial atención aos máis pequenos, campo que as Galescolas pretendían cubrir antes de que Feijóo as desarticulase. A RAG sinalou que debe facerse "respectando" o idioma das familias, pero cunha "política activa" para promover o coñecemento do galego.
Advertiu tamén que a política lingüística non debe quedar "reducida" ás aulas, senón orientarse tamén a outros ámbitos da vida como a empresa, a universidade, as actividades vinculadas ao lecer ou as novas tecnoloxías. A RAG defendeu, así mesmo, o proceso de normalización lingüística e achacou aos "contrarios" deste proceso de "manchar a palabra normalización coma se significase agresión aos que non teñen o galego como lingua habitual". Os académicos sosteñen que esta aversión xerou un "falso concepto de liberdade, que parecen entender como dereito a non falar nunca o galego".
Ao mesmo tempo, chaman a "impulsar unha cooficialidade simétrica dentro da Constitución, na que todos os cidadáns teñan dereitos e deberes co castelán e co galego, única forma de acadar a igualdade cidadá".
Nese sentido, consideran que o desenvolvemento do Plan xeral de normalización da lingua galega é esencial para apontoar o uso do idioma.
comentario [ 1 ]
ACADÉMICOS?
"Unha lingua de todos".
A lingua, as linguas non son de todos, en tal caso son todas as linguas de toda a humanidade; porén, a lingua galega non vos é de todos: Só vos é de quen a coñece, usa, defende e ama!
" ... convida(n) á procura dun acordo social integrador, "a prol do uso a dignidade e a continuidade do idioma"".
O acordo social integrador xa leva trinta anos na CE (art. 14, nomeadamente): na Galiza española na súa lingua coma en Castela na súa!, sen prexuízo de usar linguas alleas con quen lexitimamente aínda descoñeza a propia do territorio (ou docendi causa, iocandi causa, ou outras causas igualmente xustificadas).
O problema non vos está no acordo social integrador, senón nos desintegradores dese acordo social que antes, agora e mais despois subordenan os seus bandullos á dignidade (intereses xerais!) da Comunidade Lingüística Galega.
" 1º) Compromiso de arredar a lingua galega da controversia partidaria. A lingua é de todos e todos teñen cabida para acadar o seu pleno uso normal".
Non!, a controversia partidaria, DENTRO DO ORDENAMENTO XURÍDICO, é necesaria e útil; porén, a controversia democrática évos algo ben distante da demagoxia electoralista (vale todo!). ... E, os galegoexterminadores non poden ter cabida na normalización do galego!
" 2º) Impulso do multilingüismo. Na anterior lexislatura potenciouse o trilingüismo en moitos centros escolares (galego, castelán e inglés), que agora podería ampliarse a unha cuarta lingua, sen esquecer o acceso ás linguaxes das novas tecnoloxías".
O multilingüismo debe ser planetario!: bilingüismo necesario de lingua propia e mais lingua de integración para cada individuo (sen prexuízo, madia leva, de que cadaquén, amais, aprenda e use as linguas que queira).
O de cantas máis mellor évos unha crenza, non unha evidencia: a aprendizaxe das linguas supón esforzo, recursos ... que poden ser moi abondosos; mais, sempre limitados!
O que non vos procede é o plurilingüismo + castelán ou, mellor dito!, castelán + o plurilingüismo que se queira (supremacía do castelán en todo o territorio do Estado).
" 3º) Reafirmación e desenvolvemento do Plan Xeral de Normalización da Lingua Galega, que no seu día, por unanimidade, apoiou o Parlamento de Galicia (Doc. núm. 17629, BOPG núm. 622 do 07.09.04)."
As chapuzas sonvos chapuzas aínda que as defenda a maioría!
Non se trata de máis galego aquí (1/2, 1/3, 1/4 ...) máis galego acolá; non se trata de GALEGO SEMPRE MÁIS!; senón de que a lingua propia teña unha posición hexemónica no seu territorio propio (ou na comunidade lingüística sen territorio). Consiste en que o galego teña na Galiza española o mesmo estatus (iuslingüístico e sociolingüístico!) que ten fóra da Galiza española onde tamén é lingua propia, o mesmo estatus que ten o castelán en Castela ... NUNCA MENOS!
" 4º) Compromiso de impulsar unha cooficialidade simétrica dentro da Constitución, na que todos os cidadáns teñan dereitos e deberes co castelán e co galego, única forma de acadar a igualdade cidadá".
A oficialidade ou cooficialidade évos algo dishomoxéneo coa “igualdade cidadá”: a oficialidade afecta ós empregados públicos e autoridades, a igualdade cidadá a toda a cidadanía.
Mais, isto da “simetría constitucional” évos enganoso; pois, a Constitución estabelece claramente unha asimetría: deber dos galegos, de todos!, de coñeceren o castelán e ausencia dun deber semellante para TODOS (restrínxeo só ós que veñan desenvolver a súa vida á Galiza española) os casteláns de coñeceren o galego.
Certo que, ó meu entender, existen o deber (rectius, a carga) e mais o dereito de coñecermos e, eventualmente, usarmos ambas linguas oficiais na Galiza española; mais, nin esa carga nin ese dereito son absolutos nin, moito menos!, simétricos: o galego debe usarse na Galiza española con carácter xeral ou hexemónico e o castelán só cos outros españois que LEXITIMAMENTE aínda descoñezan a lingua española oficial propia do territorio.
Porén, semella que a “simetría constitucional” da RAG consiste en discriminar a lingua propia fronte a unha das alleas polo feito de seren ambas oficiais no mesmo territorio. Mais, igualar o que é diferente évos discriminar: non pode ter o mesmo estatus a lingua propia que unha allea no territorio da propia!
Con todo, á Comunidade Lingüística Galega da Galiza española non lle convén, non resulta acorde cos seus intereses xerais, esa asimetría constitucional galego vs castelán; senón a galego vs lingua universal de integración. E deberamos esixila!
NÓS ... NUNCA MENOS!
Escribe tu comentario
www.elcorregallego.es no se hace responsable de las opiniones de los lectores
y eliminará los comentarios considerados ofensivos o que vulneren la legalidad.
nas páxinas de Galicia Hoxe envíe un
e-mail a info@galicia-hoxe.com.
Titularidade e política de privacidade
Tódolos dereitos reservados. Prohibida a
reproducción total ou parcial do contido sen a
expresa autorización do propietario.
