libro

A identidade flexible

María Reimóndez reflexiona na súa terceira novela sobre a procura da definición dun camiño propio na vida alén dos patróns establecidos socialmente en cada época

M. DOPICO . SANTIAGO

A busca da propia identidade e todas as loitas que ese proceso implica. Encarnada en tres personaxes que se rebelan contra os patróns de comportamento establecidos. É o cerne de Pirata, a terceira novela da escritora María Reimóndez, que acaba de publicar Xerais.

Dúas das personaxes de Pirata, Mark Read e Anne Bonney, están baseados en persoas que existiron na realidade, cuxas peripecias están recollidas nun libro de 1724 co que a creadora de O Club de Calceta se atopou realizando unha traducción: A historia xeral dos roubos e asasinatos dos piratas máis infames.

"Documenteime intensamente para escribir este libro. É unha obra de ficción, non é unha novela histórica, pero a parte de acción recolle dun xeito bastante fidedigno o que lin. Construín os personaxes a partir do que só eran datos...", explicou Reimóndez nunha entrevista.

"O que máis me fascinou de toda a historia é o tema das identidades, que son fluctuantes, permeables, flexibles. A personaxe principal" -Mark Read- "manifesta como somos o que perciben de nós. É o que di Judith Butler sobre o xénero: que é unha representación. As personaxes demostran como é posible levar unha vida que non é a socialmente esperable segundo o teu xénero, clase social...", salientou. Malia que a imaxe da portada poida levar a interpretar o contrario, Pirata non é un libro para nenos, nin un relato de aventuras, senón unha obra de personaxes, que a autora estrutura en partes: Azul, Vermello e Negro. "O azul do mar, o vermello do sangue, o negro das bandeiras piratas. Na primeira parte hai máis introspección, na segunda máis acción. O de aventuras é un xénero tipicamente masculino, entón hai un xogo cos libros de aventuras, pero para contar algo totalmente diferente. Para min foi moi divertido escribir esta novela", asegurou María Reimóndez.

A imaxe que a autora transmite do mundo do pirateo non é, tampouco, a que se instalou nos imaxinarios. "Non lin libros de piratas, senón de historiadores e historiadoras, que demostran que os piratas nin eran moitas veces tan violentos, nin conseguían grandes tesouros; que apreciaban aos poetas e músicos...", aclarou.

Mark Read, o protagonista, é unha persoa que procura o seu lugar. Tras pasar a infancia como criado e acadar o recoñemento como soldado ao servizo do rei, acaba atopando a súa identidade facéndose pirata. Pero os seus conflitos aínda non están resoltos. E para avanzar nesta andaina apóiase, primeiro, en Madame Ébano, unha muller que, tras verse obrigada a renunciar a un amor prohibido, refúxiase nun prostíbulo, no que vive vendendo os seus remedios e a súa sabedoría sobre menciña natural, herdanza que lle transmitira a súa nai que, coma ela, fora escravizada pola súa cor de pel.