idioma

Premios San Martiño para Carlos Varela e para Franco Grande

O Premio San Martiño de Normalización Lingüística recoñece o labor de Carlos Varela como fiscal xefe do Tribunal Superior de Xustiza de Galicia

MARÉ . SANTIAGO

Xosé Luís Franco Grande (esquerda) recibe o premio a toda unha vida, mentres Carlos Varela, o fiscal xeral do TSXG, recibe o San Martiño no ámbito galego

Hai xa case dúas décadas que o galego ten premio na Estrada. A Asociación Cultural O Brando acaba de anunciar os novos nomes que dende este outono pasarán a formar parte da longa lista de persoeiros e entidades da comarca e de Galicia que contan co premio San Martiño de Normalización Lingüística.

O mundo da xustiza, da cultura e do asociacionismo son os protagonistas desta décimo novena edición. No ámbito galego, o premio outórgase a Carlos Varela García, fiscal xefe do Tribunal Superior de Xustiza de Galicia (TSXG), pola súa implicación na promoción do galego dende hai anos, "en especial en iniciativas que con carácter transversal introduciron o idioma en sectores estratéxicos como o ámbito da xustiza entre outros moitos".

A traxectoria de Carlos Varela sobrancea, precisamente, nun ámbito onde a normalización do idioma propio rexistra unha maior resistencia e onde, tradicionalmente, se producen máis reclamacións por parte dos cidadáns. Porén, Varela mantivo o seu decidido apoio á presenza do galego na Xustiza e a equiparar os dereitos dos galegofalantes.

O premio a toda unha vida é para Xosé Luis Franco Grande, (Tebra-Tomiño, 1936), escritor e avogado, e un dos promotores da Editorial Galaxia e de múltiples iniciativas de carácter galeguista. Franco Grande, membro da Real Academia Galega, foi ademais autor, entre outras obras, dun dicionario galego-castelán, de 1968, que se converteu en referencia indiscutible nos primeiros anos da recuperación do galego. Entre as súas obras, sobrease Os anos escuros I. A resistencia cultural da xeración de La Noche (1954-1960), un ensaio publicado no 1985. Figura emblemática tamén da xeración da posguerra, Franco Grande cultivou o teatro e a poesía. Neste último xénero, publicou no ano 1987 O tempo á espreita.

O San Martiño súmase, deste xeito, a outros recoñecementos que o escritor recibiu como o Pondal ou o Nacional de Literatura Rosalía de Castro.