da fala

A Mesa lembra que non hai xustiza de calidade sen a lingua

Callón reclámalles reflexión aos xuíces decanos que acordaron innecesaria a obriga de coñecer o galego para exercer a xurisdicción

. REDACCIÓN

A Mesa pola Normalización Lingüística replícalle aos xuíces decanos que "non hai xustiza de calidade sen o galego" e pídelles que "reflexionen" e non fagan "declaracións frívolas sobre os dereitos lingüísticos". Ademais, a plataforma de defensa da lingua lembra que o Consello de Europa afirma nun informe de 2005 que a xustiza é un dos ámbitos onde máis se vulnera o dereito ao uso do galego. Ao respecto, o presidente da Mesa, Carlos Callón, afirma: "A inmensa maioría da sociedade quere que o galego deixe de estar nunha situación de inferioridade xurídica".

Así de contundente é a reacción da Mesa pola Normalización ás conclusións dunhas xornadas de traballo celebradas polos xuíces decanos galegos, onde se considera "innecesaria calquera obrigatoriedade do deber de coñecer o galego para exercer a xurisdición". O xuíz decano de Ourense, organizador de dito encontro, declaroulle aos medios de comunicación que "no ámbito da xustiza galega non se detectou ningún problema no referente ao uso da lingua".

O Presidente da Mesa pola Normalización Lingüística, Carlos Callón, lamenta que haxa xuíces decanos que "fagan declaracións frívolas sobre a continuada vulneración de dereitos lingüísticos na Administración de Xustiza en Galiza", unha situación tan precaria que mesmo foi denunciada no ano 2005 polo Consello de Europa.