"Coa forza da xente"

O BNG di que é a única menciña para frear as ideas do líder dos populares

Multitudinario acto nacionalista coas súas catro "cabezas" ao Congreso e Anxo Quintana receitando "BNG e Galiza" como "única menciña para frear a Rajoy e ó PP"

REDACCIÓN . SANTIAGO

Abraira, Jorquera, Quintana, Davila e Tabarés, onte en Santiago FOTO: Ramón Escureddo

O Bloque Nacionalista Galego celebrou onte no Palacio de Congresos de Santiago unha multitudinaria Convención Nacional Electoral que, encabezada polo portavoz nacional do BNG, Anxo Quintana, estivo protagonizada polos números un das catro circunscricións galegas: Paz Abraira (Lugo), Olaia Fernández Davila (Pontevedra), Francisco Jorquera (A Coruña) e Iago Tabarés (Ourense).

Precisamente, Tabarés apelou á importancia das eleccións do 9 de marzo nas que "podemos conseguir que, cada vez menos cousas dependan do goberno do Estado e teñamos máis autogoberno". Para iso, "a forza do BNG", dixo, a diferenza doutros partidos con "hipotecas con grupos económicos e mediáticos", é a "forza da xente, e o noso motor é o amor e compromiso co país".

Na mesma liña, Anxo Quintana advertiu que para "frear as ideas de Mariano Rajoy e do PP, a única menciña é Galiza e o BNG". Neste sentido, o líder do Bloque mencionou "o empeño do número un do PP en dicir que a xente ten problemas en Galiza para falar en castelán. Dicíndoo insulta a nosa intelixencia".

Fronte a esta actitude, Quintana reafirmou o compromiso do Bloque de actuar sempre con transparencia e anunciou que acudirá ao debate na TVG ao que veñen de ser convocados os líderes das tres forzas políticas galegas, polo que emprazou a Pérez Touriño e a Núñez Feijóo "a acudir debater igual ca min, sen condicións previas. Porque o BNG non ten problemas en debater e o que quere é xustamente falar da actual situación política".

Mentres, Paz Abraira incidiu en que as mulleres "tamén nos xogamos moito nestas eleccións" e referiuse ao aborto, "unha decisión non desexábel" pero na que a muller "debe ter o dereito a decidir sobre o seu propio corpo". E o BNG, insistiu, "é a única forza que defende aberta e claramente unha Lei de prazos".

Para Davila "perseguimos un Estado que acepte un diálogo bilateral, en pé de igualdade con Galiza"e Jorquera, lembrou que nestas eleccións "o BNG vai ser decisivo".