made in england

Aqueles libreiros

PILAR POUSADA

Leo nun artigo que na cidade onde vivo había hai arredor de vinte anos máis de 15 librerías de segunda man, desas que nós chamamos de vello, un refuxio a onde ían parar os libros de profesores que a piques de retirarse non tiñan espazo na nova casa para tanto material acumulado durante a vida, os manuais xa non necesarios utilizados polos estudantes durante os anos de carreira, as novelas que nunca chegaron a convencer? é, á fin e ó cabo, a mellor forma de preservar unha obra cando un xa non ten necesidade ou ansia dela. Hoxe, na rúa principal da miña cidade só hai unha desas librerías de vello, e os seus donos teñen que buscar imaxinativos modos de manter unha boa colección, chea de materiais raros e difíciles de conseguir. Un labor calado e minucioso.

Na miña vila natal, á beira do Atlántico, nunca houbo unha librería de vello, eu non entrei nunha destas tendas ata que cheguei á Universidade, o que parece un pouco triste sobre todo pensando en que os mozos sen demasiados cartos poden ter nestas librerías solucións baratas á súa avidez lectora.

Manter unha librería de vello nun tempo no que as grandes superficies enchen o peto cada Nadal vendendo as novidades e os premios máis destacados na literatura nacional e internacional debe ser desmoralizador. É a presión de ter que entrar unha loi- ta perdida de antemán. Pero hai quen soubo ver o potencial de internet para este sector económico, para vantaxe dos amantes dos libros. En España chámase Iberlibro, en Inglaterra chámase Abebooks, pero a filosofía é a mesma, poñer a disposición dos libreiros de vello e dos seus clientes unha plataforma en internet para a venda dos seus fondos.

Un dos atractivos de Iberlibro é que, nun minuto, un pode acceder a librerías de todo o país, librerías que nos enviarán o libro á casa, gastos de envío por medio, claro. Un pode pensar que estes gastos de envío son un extra-cargo, pero os libros de segunda man poden estar moi ben de prezo, polo que a un non lle importa tanto pagar ese extra. Sobre todo cando un ten acceso a unha obra xa descatalogada e que nunca atoparía nas súas librerías habituais. O que máis me gusta desta iniciativa é que lles dá unha oportunidade a estes pequenos negocios. É un uso intelixente da rede e debe ser aplaudido. Aquí vou outra vez, xa estou entrando na páxina web?